真綵WQ重注得手

猪拉多纳

尋日沙田日賽，落飛黨連場有大動作，不過有靈有唔靈，好似第四場安國倫策騎嘅「招財快駒」，臨場瘋狂落飛，成為兩倍大熱門開跑，不過終點線前被雷神嘅「電訊太子」殺低，飲恨得亞軍。去到第五場，輪到容天鵬嘅「真綵」被落飛黨睇中，閘前獨贏賠率急跌，被捧為3.6倍大熱門，呢隻新勝馬就飛到馬到，喺柏寶胯下完成連捷任務，另外搭「南莊多寶」連贏位亦着啡格，結果順利埋Q，落飛黨同跟風客肯定大有斬獲！
       
真綵加盟容廐兩戰兩勝，柏寶過終點極度興奮。
轉容廐兩戰兩勝

「真綵」之前喺何良馬房十三戰全敗，但加盟容天鵬之後，好似變咗第二隻馬咁，先於3月9日勝出泥地1800米，昨午再於田草1800米取得連捷，轉投容廐兩戰兩勝未逢敵手，化腐朽為神奇，省靚招牌。