愛華頓衝前四作客拆紐

猪拉多纳

紐卡素今晚英超快車於主場對愛華頓，「喜鵲」法國幫勢力龐大，但只視球會為踏腳石，近期盛傳隊內首席射手雷米想於今夏去阿仙奴，班波軍心不穩，教頭柏杜仍要坐波監，對住未放棄爭奪歐聯席位嘅愛華頓無力搶分，「拖肥糖」讓平半要上盤！

（now 623周三凌晨3時45分直播）
雷米嗌走擾亂軍心

紐卡素只係中型班，一旦有大會挖角好難留人，好似中場卡比耶喺冬季轉會窗去咗巴黎聖日耳門。「喜鵲」今季由昆士柏流浪借得法國射手雷米，佢貢獻13個士哥成球隊聯賽No.1射手，但呢位射手賽季未完就放晒風話要去偶像亨利舊會阿仙奴，難免會亂軍心，佢今場仲會同右閘迪保治齊齊休戰。

另一邊廂愛華頓主帥馬天尼斯話明仲未放棄爭奪歐聯席位，佢哋打少場落後第四位阿仙奴8分，「兵工廠」勢頭轉弱，唔係冇得追。愛華頓作客連輸四場，但對手係阿仙奴、利物浦、車路士同熱刺等硬嘢，今場防線重心菲臘積基爾卡有望復出鎮守後防，前面就有弗爆小魔獸盧卡古爭取士哥，要砌低「喜鵲」唔係難事！