阿仙奴輸到慌 史雲斯作客爆廠

猪拉多纳

開講有話濕水炮仗燒唔響，用嚟形容阿仙奴最好不過，教頭雲格日前領軍千場里程碑，喺英超淨吞車路士半打光蛋食到滯，士氣直插谷底，今晚聯賽快車返酋長球場迎戰史雲斯，筆者唔信呢支「濕水大炮」轟得響，受讓捧「天鵝」2.6倍「讓球客勝」。

（now622台周三凌晨3:45直播）

阿仙奴上場被「點錯相」固然慘情，明明阿歷士張伯倫犯手球，點知球證馬連拿竟然紅牌趕基蘭基比斯出場，搞到英格蘭足總賽後都主動「跪低」認衰：「球會可以就錯判提出上訴，英足總會即時就事件進行調查。」賽後講明會上訴嘅阿仙奴，相信基比斯打甩呢面紅牌機會極高。
雲格雪施捷斯尼

可惜基蘭基比斯就算趕得切今場復出，都幫唔到阿仙奴幾多，事關「兵工廠」中前場傷兵潮至係問題所在，縱使韋舒亞同艾朗藍斯康復進度理想，但今場依然未踢得，加上奧斯爾同禾確特養傷，雲格前線兵源捉襟見肘，進攻套路想變都變唔到。

更何況阿仙奴之前聯賽作客大敗畀曼城同利物浦兩支爭標對手後，跟手返到酋長球場只能夠同車路士同曼聯握手言和，由此可見今季主場贏到開巷嘅「兵工廠」，大敗後往往唔能夠及時調整。至於英國《每日星報》有報道指，教頭雲格唔滿意施捷斯尼上場表現，將會改派今季落場機會唔多嘅法比安斯基把關，今場熱爆主勝隨時係糖衣陷阱。
天鵝要護級鬥心勁

史雲斯自從由蒙克出任看守領隊，除咗首戰領軍擊敗卡迪夫城打響頭炮，其後各項賽事8場3和5負冇贏過，單計5場作客更係1和4負。雖則戰績曳爆，但徘徊喺降班邊緣嘅「天鵝」，球員勝在夠鬥心爭護級，近兩場聯賽作客態勇嘅「默西賽德郡雙雄」利物浦同愛華頓，最終只係僅敗3:4及2:3，今場夫添鬥正值頹勢嘅阿仙奴，要成功喺酋長球場全身而退，絕非天方夜譚。
Data King：兵工廠英超主場不敗

‧史雲斯近9場聯賽作客3和6負。

‧阿仙奴近13次主場出戰英超未輸過，成績為10勝3和。

‧阿仙奴今季14戰英超主場半場從未落後，成績為7勝7和。
乜都玩錦囊：半場細值得追

阿仙奴上輪聯賽鬥車路士輸鑊甘，今晚返到酋長球場出戰史雲斯，就算牌面佔優，主帥雲格亦肯定落柯打叫班球員踢穩陣波，加上佢哋今季喺酋長球場14次出戰英超，總共開出11次「半場細」，比率接近8成，今場值得再追。