曼聯老鼠拉龜博「讓和」

猪拉多纳

魔躉「空襲」奧脫福抗議莫帥

曼聯早前喺主場慘吞利物浦3蛋後，上場「曼市打吡」又再吞曼城3蛋，今季奧脫福威力蕩然無存，到目前為止喺主場已錄得6場敗仗，就連朗尼都話依家無人會驚佢哋！今晚主場迎戰阿士東維拉，球迷更計劃發動「空襲」，租用飛機喺奧脫福球場上空展示「Wrong one-Moyes out」抗議橫額。睇怕「紅魔鬼」又要陷於苦戰，3.35倍「讓球和」咁好分，值得一試！

唔單止「魔迷」唔妥莫耶斯，就連球隊都不斷傳出內訌嘅消息，繼早前話尹佩斯唔Like領隊嘅操練安排，尋日又傳出老將傑斯同莫帥反目，球隊上下都唔團結，又點會有好表現呢？雖然朗尼、桑馬達等頂級球星仍然有能力靠自己爭勝，但以「紅魔鬼」依家嘅氣氛，相信球員都會踢得窒手窒腳，主場對維拉都唔會有絕對優勢，頂多都係小勝一粒啦！
維拉作客腳軟

至於踏入3月一度反彈嘅阿士東維拉，今季作客表現認真麻麻，14戰客場比賽只係贏過4次，上輪主場更以1:4大敗畀史篤城，球員信心難免受打擊。即使比利時中鋒賓迪基近排狀態唔錯，但去到奧脫福相信都會屯重兵防守以1分為目標，曼聯有尹佩斯打柴，隨時變咗老鼠拉龜，心水推介「讓球和」！