近期殺得性起田泰安「友」帶挈

猪拉多纳

　　今晚谷中A欄8場賽事，頗有機會迭爆連場，一場又一場的大雨，必令到場地起了變化，話唔定就係咁淋熄好多匹熱門馬！所以，今晚真係要小心行事，免得過就免，咪作無謂犧牲。

　　講到騎師方面，近期前列幾位成績都唔錯，潘頓密密食，韋達時有佳作，而安國倫多數日行一善，但係唔能夠唔提田泰安，肯定要封佢為三月之星，一個月內可以有3次連中三元，真真正正殺得性起，踏入四月份，希望佢繼續咁勁，帶挈到普羅馬迷。

　　呢期田泰安隔晚騎師王賠率冷至廿幾倍，出馬唔算多，實力又唔算強，唔係都唔會咁冷，不過咁，佢有幾匹坐騎唔係冇料到，賠率冷還冷，唔代表冇機會砌贏啲對手。

　　第四場四班1200米，田泰安騎「仁愛之友」，呢匹四班中下駟，賣點係近績準到出奇，又咁好命繼續排到內檔，可信程度提高。

　　君河趁地淋

　　第八場三班1800米，「君河」近期喺谷草一哩係咁輸，今勻重返勝途，趁地淋擺喺前面走，點都着數啲。(Jack)