作客No.1曼聯捕喜鵲

猪拉多纳

英超風流球隊紐卡素本周主場迎戰褪色勁旅曼聯，主隊粉絲不滿球會冇大志，計劃上街示威，但「喜鵲」位置唔上唔落，餘下六戰有如例行公事，主帥柏杜直言好難刺激將士搏命，加上大軍傷兵問題嚴重，就算主場出擊都信唔過，曼聯讓平半捧上盤！

紐卡素球迷組織Mike Ashley Out Campaign（艾殊利滾蛋）近日又有新搞作，佢哋不滿球會老細艾殊利只以保住英超席位為目標，完全冇諗過踢歐洲賽，同時指摘佢利用主場宣傳自己間公司，根本冇心搞好班波，所以決定於市內街頭示威，希望球會管理層正視問題，重整治軍方針，唔好再沉淪落去。
紐卡素殘陣冇目標

「喜鵲」教頭柏杜深知球迷不滿，但佢哋唔愁降班，又冇份爭歐洲賽席位，佢都話搞唔掂班兵：「季尾冇明確目標真係好難保持戰意，我會盡量叫班球員集中精神。」不過，大軍王牌前鋒雷米、中場大將穆沙施素高、右閘迪保治及門神告魯爾都要養傷，戰鬥力起碼打七折，今場就算有心搶分都係無力殺敵。

今場夾正喺曼聯兩場歐聯8強賽事中間，現時星級射手尹佩斯要養傷，守將莊尼伊雲斯、基斯史摩寧、阿歷山大畢拿等全部有傷，「紅魔鬼」無可避免需要輪換陣容。桑馬達、贊奴沙同查維亞靴南迪斯等人有望落場，不過這班副選個個都有卡士，點秤都高過對手，佢哋今季衰在主場唔掂，淨計作客成績係英超No.1，今場贏得啦！　
now 621周六晚10時直播