利華秘密戰術炒哈化

猪拉多纳

拜仁慕尼黑晨早喺德甲封王，不過來屆歐聯參賽資格依然爭崩頭，當中力求反彈嘅利華古遜，今晚會喺主場恭候哈化柏林，看守教練沙查利雲度夫斯基已經度咗套「秘密戰術」，相信「折箭」嘅哈化難逃大敗，利華讓半一捧上盤。

（有線61、64、201及203周日晚9:30直播）
哈化阿祖安拉莫斯缺陣

利華近12仗只曾1勝，上仗輸畀漢堡之後，會方即刻炒咗教練希比亞，由沙查利雲度夫斯基掌舵至季尾，呢位仁兄日前督完操之後受訪，自爆試咗好多新嘢，表示今仗或會改以442或4231陣式出戰，又話臨場先會公布正選陣容，似乎好多大計去對付哈化咁喎！

查實照秤人腳，利華高哈化幾班，即使防中連拿迪斯去咗瑞士巴素利做小腿手術並宣布提早收咧，但只要利華戰將發揮正常嘅話，就算沙查利雲度夫斯基唔搞咁多嘢，要砌低哈化都綽綽有餘。

咁睇死哈化，除咗因為佢哋已經連續7場聯賽失分之外，最大鑊係首席射手阿祖安拉莫斯因為右腳大腿受傷肯定缺陣。呢位哥倫比亞射手今季已經貢獻16球同5次助攻，鋒力不嬲曳嘅哈化冇埋佢，恐怕連還擊之力都冇埋。