基達菲細守風流利雲特

猪拉多纳

咩嘢係風流波？利雲特就用「實績」話畀你知。「小蝙蝠」現時喺西甲排第十，既被前列球隊大幅拋離難爭歐洲賽資格，又幾近上岸唔愁降班，正宗比上不足、比下有餘，冇乜戰意下近期開始玩嘢，之前七場聯賽竟然輸咗五仗，上場作客維拉利爾原本守得好哋哋，點知喺補時5分鐘遭佩比絕殺，都咪話唔打擊士氣。

今仗「小蝙蝠」主場迎戰尾三基達菲，後者換咗前羅馬尼亞名將高士曼干查為帥冇乜起色，好彩佢哋只落後尾四華拉度列一分，尚有五輪比賽，護級仲未絕望，撞正利雲特有「奧地利碧咸」艾雲舒捷斯、施素高及卡拉比拿斯等主力缺陣，不過基軍主力拿菲達今仗要停賽，森美亞、謝美加維蘭及沙治奧艾斯古迪路上陣成疑，以佢哋近五仗輸四場嘅頹勢，就算想搶分亦唔敢貿然搶攻，必定先穩守玩拉布，加上近六次交手五開入球細，細盤咁旺乃不二之選。

（now 632及TVB 13周日凌晨零時直播）