金珀龍華唔再托大

猪拉多纳

　　今日有4場泥地畀大家玩吓，總好過之前1日得兩場，賭仔有時間揣摩吓跑道模式，較後場次就會多啲信心重擊，贏唔贏係後話，至少買落去唔會十五十六，對賭仔及馬會嚟講，係雙贏之局。

　　第二場四班1000米。「金珀龍華」初出之前已經有動靜，阿強啲新馬邊度有人敢賭，但開飛後賠率長期唔夠10倍，結果後上跑第四，唔係慢咗閘一定追番個位置。再出唔敢托大，賽前跳番多啲，用埋韋達，經已擺出不勝無歸之勢。

　　第九場二班1200米泥地。「輕彈錢笑」身形瘦瘦削削，外觀唔多似高班馬，但唔經唔覺佢殺到上呢班，唔到我哋唔佩服蔡神仙嘅功力。今次對手同之前嗰啲比，點都有距離，但係由頂磅減至124磅，馬仔細細應可大幅提升威力。再者，呢匹馬跟得鬥得，有極強鬥心，睇嚟分數未盡㗎。

　　第十場三班1400米。「碧科」唔係咁鍾意韋達前一場嘅發揮，如果跑得好少少，幾時輪得到「川河首駒」贏到吖！隔咗1場，米高鄭又畀韋達跑番，佢老哥重奪策騎權，冇理由以失威為首要任務啩？如果佢醒醒定定，跑出隻馬最佳水準，有力食尾胡。陳華棟 資深評馬人