年年如意先拔頭籌

不死鸟

各位都應該聽過「此處不留人，自有留人處」，上季響香港成績漸走下坡嘅戴勝，今季即使返到佢嘅地頭澳洲都係鬱鬱不得志，坐騎少之又少，迫到佢要再次出走。不過勢估唔到，兜兜轉轉之下，呢位過氣名將去到毛里裘斯終於可以重振聲威。

戴勝毛里裘斯發威

        自四月四日去毛里裘斯發展之後，戴勝嘅表現可以用漸入佳境嚟形容，計埋啱啱禮拜六嗰次賽事，呢位當年有金童子之稱嘅好手，響短短一個多月之內已經交出九Ｗ七個第二，尤其響五月二日最威水，當日只係跑五場賽事，佢居然憑Volte Face、Short Corner、Skid Row同埋Wave Dancer四匹馬食出大四喜，唔單止響騎師榜領導群雄，仲立即成為當地馬圈嘅風頭躉，各大報章都搵佢嚟做馬經版頭條，訪問一個接一個，以往風光嘅日子又再重現。

        由於當地人一向講慣法文，到呢一刻都仲未可以清楚講出戴勝嘅英文正確發音，但近幾年做慣配角嘅戴勝，坦言好享受當地嘅競賽氣氛。

        事實上，毛里裘斯吸引到戴勝留低，除咗生活夠寫意、環境夠晒清幽好似世外桃源咁之外，每星期只跑一次賽事亦係另一原因。

        騎師響毛里裘斯騎馬，基本上一個禮拜實際只係工作三日，比起幾乎日日跑嘅澳洲、新西蘭，甚至係香港都明顯輕鬆得多。戴勝仲話佢張合約雖然係由四月騎到十二月，但係佢好肯定唔會咁快返屋企，仲打算留低作長線發展。

        講番聽日賽事，列陣頭場五班二千二百米嘅「年年如意」，在港首次上名正係由戴勝經手，上仗跑田草千八米所負不遠，今次增程跑番大長途應更合發揮，有機會先拔頭籌。