飛天龍駒除配備搏

猪拉多纳

　　睇方嘉柏馬房今晚陣容鼎盛，肯定不是湊熱鬧，當中夥拍潘頓上陣的「光速銀桂」、「紅簿仔」、「天合」及「自由式」牌面硬淨，儘管未必隻隻贏，但唔預一注並非上佳策略。另外，有四匹方廐馬配其他騎師都要留意，牌面雖不算高，但卻是潛伏分子，跑得好也不意外。

　　本來，我對「天合」最有信心，但若然方嘉柏上半場已贏到開巷，這匹馬就難有分頭了，在這情況下，我寧願先博上半場的方廐馬，最起碼有可觀分頭。當中我較喜歡出爭頭場五班1200米的「飛天龍駒」，牠開季至今雖然一直未贏，但密密上陣仿如返工，今次相隔16日再跑，竟然在最後試跑安排拍閘工夫，既非本身要考閘，亦非同試的質新廐侶要考，那麼突然有這搏殺工序，看來不簡單，事關季內在相隔大概日數的情況下，也從無做過這樣的工夫；再者，「飛天龍駒」來港至今3W，原來是甚麼配備也沒用的，今次突然拍閘兼且將所有配備除去，我相信是方嘉柏花了心思的部署。無疑，這類谷草後上馬很多時要形勢配合才跑得好，但一來谷草B欄有可能利中外檔追，二來此駒必有可觀分頭，點解唔博？

    (馬會賽事 首席評述員)