好腳頭見真章

猪拉多纳

　　星期六跑馬，有泥有草，一望個排位，感覺係得一個字──亂，睇睇去，左揀右揀，好似得一兩場可以玩咋，大家聽清楚，係玩，唔係賭！因為有心水一兩場，都係亂亂，唔算好有信心種，所以，呢日阿棟實行雞仔注算。

　　第五場四班1400米草地。「好腳頭」初次出賽經已殺聲震天，原本賽事之前嗰晚，以及比賽當日賠率已經唔係冷，估唔到臨近開跑前畀人轟落嚟，賭到唔夠40蚊，只可惜，跑落唔覺有何特別，唔通名大於實？

　　睇佢呢次賽前試閘，有前又有後，試得幾吸引，比起初出之前更加省鏡，呢匹馬係咪操好賽劣，睇埋今場就知。

　　第八場三班1200米泥地。「三和福將」跑草地又好，跑泥地都好，硬係未贏到，冇法子啦，暫未開齋係自己問題，因為呢隻馬跑法單調，擺喺前面走呀走，所以成日臨尾香。

　　我唔會期望「三和福將」突然之間轉晒跑法，叻到後上力壓群雄，主要原因係今日泥地一定會蓉蓉爛爛，啲後上馬好鬼惡追，佢放頭跑，點都安全，隨時放得到。

　　定做領袖戴眼罩好事

　　第九場第三班1400米草地。「定做領袖」跑3場都係三三四四，唔算有咩突破，之但係，上場輸得好接近，睇嚟係敲緊門嘞，亦睇得出阿航好想盡快幫呢匹馬贏番場。

　　今次加戴眼罩再嚟過，用意係好，希望匹馬末段精神集中啲，從而跑快兩步，咁就有機會出頭。陳華棟 資深評馬人