奧德國生牯仔𡁻波蘭立威

猪拉多纳

騷哥利爭搭世盃尾班車

德國「邊緣人」爭搭世盃尾班車！今晚有場國際友誼賽，由德國喺漢堡恭候波蘭，雖然呢場波唔係官方國際足協賽期嘅賽事，意味住德國冇權向仲有嘢爭嘅球會搶人，但以達斯拿同禾蘭為首等明日之星為免決賽周前被叮走，今鋪肯定加多兩錢肉緊「騷哥利」，對住實力輸幾條街嘅波蘭可秤先，捧2倍「讓主」。

（now633及635台周三凌晨2:45直播）

「日耳曼兵團」主帥勒夫早前公布咗世盃30人大軍名單，但由於拜仁同多蒙特會喺周日凌晨會師德盃決賽，當日阿仙奴亦會同侯城爭足總盃冠軍，加上今仗唔係國際足協官方賽期，即係話拿姆、湯馬士梅拿、馬高列奧斯同普多斯基等骨幹都唔會為德國披甲，所以勒夫今仗徵召咗唔少新仔，以為呢班生牯仔好恰？咁你就錯嘞！
達斯拿 禾蘭孭飛勒夫話明揀蟀

睇番今仗嘅18人名單，達斯拿、安達夏恩、哥列斯卡同禾蘭等都有份入選德國世盃30人初選名單，勒夫話今場之後就會叮人，訂立最後23人大軍名單，但就畀晒Signal叫班小朋友要搏老命：「國家隊需要新血，4年前我哋捧起唔少新星，今次我都希望啲新人畀驚喜我！」去巴西踢決賽周喎，唔加多兩錢肉緊點掂？一班生牯仔肯定當呢場波係決賽咁踢！中場達斯拿同安達夏恩有幾好波大家都知，可翼可鋒嘅禾蘭今季喺德甲更加貢獻11球、10助攻嘅「雙雙」數據，戰鬥力有保證之餘，鬥心同戰意亦未必會輸蝕畀班大師兄。

德國冇多蒙特嘅人使，波蘭亦都係一樣，最做得嘢嗰件射手羅拔利雲度夫斯基缺陣，前線只係靠奧格斯堡嘅米利克孭飛，成隊波最叻已經要數到不來梅中場奧拜尼亞克。人腳輸幾條街，雙方過去17次交手，德國更加錄得12勝5和戰績，今鋪波蘭想唔輸鋪杰嘅都難！