筍盤益你:朝東之寶逢出必拼

不死鸟

 周三嘅谷草賽事，八匹頭馬中有五駒今季未贏過，證明跑到季尾階段，不妨秤先一啲仲未交代嘅實力馬。第十場二班千六米，「朝東之寶」今季頭四仗由姚本輝訓練，只得一席季軍後轉投徐廐，至今三戰順序跑第二、五同六名，而且每次都相當接近，未能開齋的確差少少運氣。

         上仗「朝東之寶」喺千四米輸畀今次又同場嘅「藍天」，不過呢次轉跑千六米，長番二百米應更合「朝東之寶」追趕，兼且主要對手「魄力寶」、「一號種籽」同埋「家家寶」全排十檔以外，計落排八檔嘅「朝東之寶」形勢相對會好少少，加上馬主逢出必拼，初配黎海榮或有驚喜，不妨WP捧場。

         今晚上演英甲升班附加賽次回合，米爾頓凱恩斯上仗作客斯肯索普踢成一比一，由於唔設作客入球優惠，即係上仗等如冇踢過，但前者返主場應可砌低斯肯索普，跟列斯聯或米禾爾勝方爭奪最後一席升班席位。

         米爾頓凱恩斯今季喺英甲取得八十七分排第三，落後第二名彼德堡兩分，搞到冇得直接升班，不過排第六嘅斯肯索普全季只得七十六分，實力上明顯同主隊有一段距離，加上主隊季內共入八十三球，而二十三次主場只失二十五球，證明攻守能力兼備﹔既然斯肯索普今季作客二十三場只贏九次，梗係買主客和主勝較穩陣。