馬房秘聞:伍廐羅漢弗到想咬人

不死鸟

▲蔡明紹剛戰騎「當旺」影相贏馬，表現可圈可點，但出策「福建王子」時就影相輸咗，可謂有得亦有失。

        噚朝告東尼就安排「祝福滿滿」同「飛快勇」由紹仔親自出試，收操後即叫騎者返馬房寫字樓，重播周三晚兩場賽事終點前嘅壓線鏡頭，並且親自傳授壓線技巧，指出可以改善之處，並叫紹仔得閒多騎木馬練手力。紹仔聽完後獲益良多，且看今戰能否幫師父贏馬以作報答。

        ▲徐君禮剛戰勝出「年年如意」，因而獲伍碧權賞識，今戰將「羅漢」交予騎者操刀。噚朝權哥安排徐君禮親自替「羅漢」響河畔草地拍跳，跳完後權哥親往接馬，並與騎者研究今仗作戰大計。呢隻馬上仗由於心律不正常大敗而回，賽後權哥花盡心機去養回馬匹健康，近期更加料催谷，令到呢隻馬心火旺盛，響馬格內更不時伸頭出外想咬人，今仗交由伍廐福將徐君禮執韁，且看能否繼續擦出火花。

馬偉昌刮起旋風

        ▲馬偉昌剛戰起孖兼做埋騎師王，昨朝繼續成為大紅人，到場後立即替葉楚航出試「大旋風」，其後亦操埋「勝在分秒」、「晨速」，試完三匹葉廐馬後，葉楚航前往機坪接馬並與騎者密斟，之後馬偉昌再替摩廐「駿方」響河畔草地拍跳。完成操練後，馬偉昌向副練匯報馬匹情況，收操之後更入馬房仄各駒食料情況，可見今戰心中有馬。